FM Husu PNTL Fó Sai Rezultadu Investigasaun

Dili-Relasiona ho atuasaun ne’ebé PNTL hala’o ho objetivu kria Pás no estabilidade\
iha rai laran. Maibé, hare ba atuasaun ne’ebé PNTL hala’o iha área Hera rezulta
juventude ida tenke Mate ho kilat musan ne’ebé deskonfia tiru husi membru PNTL
iha tempu hala’o atuasaun.

Polisia Task Force fo siguransa ba matebian ( Armindo Pereira) ne'ebe deskonfia hetan tiru husi membru PNTL

Husi parte Instituisaun PNTL ninia deklarasaun ba públiku liu husi servisu
investigasaun kriminál (SIC) hateten, kona ba prosesu tiru mate Joven ida
iha Hera sei iha prosesu investigasaun no seidauk deklara ba públiku katak,
membru PNTL mak tiru. Ne’e signifika katak, rezultadu investigasaun too agora
seidauk identifika klaru kona ba verdade husi akontesimentu ne’e atu fó sai ba públiku.
Hare ba kestaun ne’e Diretór FM Nelson Belo hateten, too ohin loron Instituisaun
kompeténsia ne’ebé hala’o kna’ar kona ba informasaun ba povu kona ba prosesu
hamate joven ida iha suku Hera ne’ebé envolve elementu balu husi polisia eskuadra
Hera seidauk iha informasaun ne’ebé klaru.
Tanba, too agora Povu tomak seidauk hetan prosesu investigasaun ne’ebé hala’o
husi SIC no suspeitu sira kaer ona atu bele tuir prosesu investigasaun seidauk
hatene klaru. “Fundasaun Mahein (FM) ezije povu nia diretu atu tuir prosesu
ne’e no iha diretu hetan informasaun husi Instituisaun relevante.
Husi akontesimentu ne’ebé mensiona iha leten.
“FM ezije Instituisaun PNTL hala’o investigasaun lalais kazu envolvimentu membru
PNTL ne’ebé tiru estudante Universidade Dili (UNDIL) ne’ebé too agora seidauk hatene
suspeitu ba kazu refere,”dehan Nelson ba Jornalista bainhira konferénsia imprensa ne’ebé
hala’o iha edifísiu FM loron Sesta-feira (20/7) Balidi-Dili.
FM mós husu ba Instituisaun PNTL atu detein lalais suspeitu na’in tolu ne’ebé deskonfia
membru PNTL ne’ebé envolve iha kazu tiru mate estudante atu nune’e bele hala’o lalais
prosesu investigasaun.
Nune’e mós FM rekomenda ba komandu PNTL tenke fó sai rezultadu investigasaun ba públiku
liu husi Sekretáriu Estadu Seguransa. FM mós hakarak rekomenda ba lider partidu polítiku
sira atu tuur hamutuk hodi apela ba públiku relasiona ho konflitu ne’ebé akontese iha
loron 15 no 16 hodi nune’e, públiku bele hetan informasaun kona ba situasaun
Seguransa iha rai laran.
FM mós rekomenda ba Komandu PNTL atu update nafatin kona ba
seguransa atuál. Hafoin ba pos konflitu iha semana liu ba. Atu nune’e, labele kria
pániku ba povu (ts)