Jornal Timor Post - Kinta-Feira, 12 Jullu 2012
Kmanek
Haburas Unidade Timor Oan (KHUNTO), tuir planu sei hato’o keixa ba
Tribunal Rekursu (TR), wainhira rejultadu apuramentu nasional husi
Comisaun Nasional eleisoes (CNE) partidu ne’e la hetan kadeira iha uma
fukun Parlamentu Nasional.
Sekretariu Jeral Partidu KHUNTO,
Jose Agustinho da Silva, afirma lia hirak ne’e ba Timor Post, Kuarta
(11/7), wainhira ba akompania apuramentu nasional iha edifisiu CNE,
Kolmera, Dili.
Jose hateten, nia parte iha evidensia balun konaba iregularidade orgaun eleitoral sira halo durante kontazen votus.
"Ami iha evidensia lubun ida,
portantu, kuandu rejultadu apuramentu nasional ne’e mak la fo benefisiu
ba partidu KHUNTO mak ami sei liu husi rekursu extra ordinariu ba
Tribunal Rekursu," dehan Jose.
Nia hatutan, oras ne’e dadaun nia parte kontinua rekolilla evidensia balun tan atu bele hatoo ba TR.
"Mesmu ke orsida ‘bukti’ sira
ne’e la prinese rekijitus, mais ne’e ita bele sublinha katak akontese
iregularidade durante periode eleisaun no kontazen de votus," sublina
Jose.
Iha intervista ne’e, Jose dehan,
wainhira apuramentu nasional sei lao hela, nia parte iha esperansa boot
sei hetan asentu iha parlamentu nasional, tanba votus ne’ebe partidu
ne’e hetan, falta deit votus oituan para bele liu bareira 3%.
Ami presiza deit votus oituan,
ami seidauk lakon esperansa para atu hetan asentu iha Parlamentu
nasional, tanba prosesu apuramentu nasional sei lao hela," hateten Jose.