Jornal Timor Post - Kinta-Feira, 12 Jullu 2012
Partidu
Demokratiku (PD) hein politika ne’ebe mak lao ohin loron atu forma
Governu ne’ebe garante prosesu tranzisaun ba lideransa.
Ketaun ne’e hato’o husi
Prezidenti SPN (Comisariu Politik Nasional) PD, Antonio da Concecao ba
Timor Post, Kuarta (11/7) iha sede PD, Colmera, Dili.
Hanoin husi Prezidenti CPN ne’e
kontrariu ho Sekretariu Jeral PD Mariano Asanami Sabino nebe konsidera
Governu Unidade nasional ne’e hafraku demokrasia iha rai laran.
Prezidenti CPN-PD, Antonio da
Concecao afirma katak, PD nakloke ba koligasaun hamutuk ho CNRT, maibe
karik sei iha konsiderasaun politika oioin ne’ebe mak sei iha, li-liu
konaba tranzisaun lideransa, Posivelmente CNRT iha pozisaun ho meus
seluk atu koalia ho FRETILIN, PD no Frenti-Mudanca nune’e, hare ba
formasaun Governu ne’ebe garante prosesu tranzisaun lideransa.
Antonio mos dehan tan, kestaun
ne’ebe make ma seluk sei koloka mak Demokrasia iha Timor-Leste bele monu
maibe tuir PD nia hanoin realmente demokrasia asegura nafatin maibe
demokrasia la signifika lider no povu iha deit diferensia hanoin,
demokrasia bele akontese kuandu lider iha objetivu komum ida atu
defende, tanba dezenvolvimentu koloka hanesan interese nasional.
Maibe desizaun ne’e rasik laos
PD nia hanoin, maibe pozisaun tenki mai husi partidu CNRT ne’ebe lidera
husi Kay Rala xanana Gusmao no FRETILIN ne’ebe lidera husi Francisco
Guterres ‘Lu-Olo no Mari Alkatiri.
Maske Prezidente CPN-PD hein
desizaun Politika husi CNRT no FRETILIN karik iha posiblidade atu kria
governu unidade nasional husi halo tranzisaun lideransa, maibe idea
ne’ebe kontrariu ho Sekretariu jeral PD, Mariano Sabino.
Mariano afirma katak, formasaun
Governu Unidade nasional ne’ebe mosu husi hanoin lider politiku sira sei
hafraku demokrasia iha nasaun Timor-Leste, tamba substansia eleisaun
mak opozisaun no governu.
"Ita labele foti rajaun katak,
situasaun ka estabilidade ne’ebe mak ita hakarak iha Governu Unidade
Nasional, mais razaun eleisaun nian mak, ida ba governu ida seluk ba
opozisaun, ida ne’e mak substansia lolos demokrasia, ne’ebe importansia
opozisaun hanesan mos governante," Afirma Mariano Sabino, ba Jornalista
sira iha Palasio do Governo, Kuarta (11/7).
.