Imazen nee hatudu konsekuensia husi aktu krime entre Timor oan sira nebe la hadomi moris hakmatek. FOTO TS
Desizaun koliga ho PD, Frente-Mundansa ne’e hanesan desizaun ultimo tanba maioria aseita. Maibe dalan ba koligasaun mak ladun justu tanba kongresista husi distritu balu hanesan Likisa, Baukau hasai liafuan kroat hasoru partidu Fretilin.
Tanba ne’e, minute balu nia laran deit Dili laran nakdoko too distritu balu iha parte leste hanesan Vikeke no Baukau, no uma maizumenus 6 hetan sunu husi ema diskonesidu. Area hirak ne’ebé konsideradu hanesan risku ba aktu violensia mak hanesan Hera, Terminal Bekora, Kintal Boot, Fatuhada, Komoro no Kolmera besik jardim. Iha Duminggu 15/07/2012 loraik too dader, Segunda, 16/07/2012, akontese violensia makaas iha Dili ne’ebé rejulta kareta 52 rahun, polisia nain 4 kanek.
Maibe too Segunda kalan tuku 08:00, numeru kareta rahun aumenta ba 65, no membru polisia nain 5 kanek no sidadaun baibain ida ne’ebé partense ba militantes partidu Fretilin nian mate tanba hetan atake husi membrus seguransa polisia iha Hera, Dili. Matebian nudar estudantes universitariu iha Dili, nia moris fatin Distritu Vikeke.
Entertantu estudantes Eskola Sekundariu iha Dili laran loloos tenke tuir ezame iha Segunda-feira, 16/07/2012, maibe tanba akontesementu tiru no violensia ne’ebé mosu iha Dili hahu Duminggu loraik, maka estudante sira deside la ba tuir ezame. Liutan tanba transporte publiku hanesan mikrolet la halao movimentu hanesan baibain tanba tauk ema tuda. Iha parte Komoro nian, alunus balu konsege ba eskola maibe sira-nia inan-aman mak lori sira nia oan ba eskola too fila husi eskola.
Kazu violensia iha Dili laran halo polisia tenke servisu makaas hodi proteze sidadaun kiik sira husi violensia. Tanba ne’e, Komandante Jeral PNTL, Longuinhos Monteiro apela ba populasaun sira iha Dili laran atu tur hakmatek, tanba polisia hahu uza sistema zero toleransia hodi atua kriminozu sira.
Segunda-feira 16/07/2012, familia matebian halibur malu iha sede Comite Central Fretilin Komoro, Dili hodi hatoo sira nia diskontentamentu ba aktu oho kontra sira nia alin no oan. Familia sira husu ba estadu atu rezolve problema ne’e se lae maka sira ameasa sei halo manifestasaun kontra polisia. Sidade Dili iha Segunda-feira, 16/07/2012 lao ladun rame hanesan baibain.
Tanba komunidade barak deside lakohi sai husi uma tanba tauk hetan torturasaun husi grupu balu ne’ebé deskonfia mai husi grupus simpatizantes partidu Fretilin nian. Entertantu, Sekretariu Jeral partidu Fretilin, Dr. Mari Alkatiri husu ba nia belun partidu CNRT, Kay Rala Xanana Gusmão atu responsabiliza ba aktu violentu ne’ebé akontese iha Dili laran, tanba aktu ne’e mosu bainhira kongresista CNRT nian hasai liafuan kroat hasoru partidu Fretilin.
“klaru katak ami respeita desizaun partidu CNRT nian hodi hili partidu PD no Frente-Mudansa forma governu. Maibe ami triste ho liafuan husi kongresista sira ne’ebé halo traisaun ba Fretilin ninia dignidade”, dehan Mari husi ninia rezidensia Dili. Atu hakotu violensia iha Dili labele mosu tan, Prezidente da Republika Taur Matan Ruka konvida lideransa partidu CNRT, Fretilin, PD no Frente-Mudansa hodi esplika ba sira konaba Prezidente ninia pozisaun diskontente ba situasaun atual iha Dili laran.
Nune’e Prezidente da Republika husu ba lider partidu politiku sira atu hakalma sira nia militantes no hadia sira nia linguazen iha situasaun hanesan daudaun ne’e. Husi parte seluk, populasaun Distritu Vikeke ne’ebé sente an la seguru, komesa prepara an atu evakua karik mosu aktus asaltu no tiru iha sira nia distritu hanesan iha tinan 2007 formasaun governu AMP ne’ebé uma atus resin hetan sunu no ema balu mate tanba asaun brutal husi militantes partidu Fretilin ne’ebé la kontente ho formasaun governu AMP lideradu husi Kay Rala Xanana Gusmao.
Iha tinan 2007 koandu partidu CNRT la sai partidu mais votadu, maka akontese Afonso Kuda-Lai mate tanba hetan tiru husi membrus PNTL ida. Kuda-Lai nudar ekipa susesu partidu CNRT nian iha tempu neba. Agora, partidu CNRT sai partidu mais votadu maibe pursentazen la atinze numeru ne’ebé determinadu. Tanba ne’e, CNRT hili dalan komvida PD no Frente-Mudansa hodi forma governu. Maske nune’e, dala ida tan, CNRT hahu ho mosu violensia tanba masa Fretilin diskontente ho liafuan husi kongresista sira. (ts)