Jornal Independente - Segunda-Feira, 13 Agustu 2012
Ezersitu balun husi Falintil-Forsa Defesa Timor Leste (F-FDTL) foin lalais ne’e, tanba iha deskonfia diskriminasaun no elementu nepotizmu.
Tuir membru F-FDTL ne’ebe lakohi publika nia naran hateten, prosesu formasaun diviza foin lalais ne’e laiha transparansia, tanba, ema hirak ne’ebe hatn promosaun mesak mia husi familia superior F-FDTL nian.
Ne’e duni, husu ba Komisaun Funsaun Publiku (KFP) no Komisaun Anti Korupsaun (KAK) atu hala’o prosesu investigasaun ba promosaun diviza ne’e.
Tuir nia, diskriminasaun mos akontese ba iha parte kapasitasaun hanesan formasaun kursu lian Ingles no Portugues nia nunka hetan oportunidade, tanba iha relasaun familia ho nain ulun balun iha instituisaun ne’e nia laran.
Tanba ne’e, nia dehan, kuandu iha tempu badak nia laran laiha intervensaun husi lideransa sira, neineik-neineik problema diskriminasaun ne’e sei sai boot liu tan no sei rezulta ema barak mak sei sai vitima.
“Ami durante tinan tolu ona nunka hetan formasaun no promosaun diviza, maibe, sira ne’ebe iha relasaun familia ho komandante boot sira, sempre hetan beibeik oportunidade no sa’e diviza,” tenik nia iha Dili, foin lalais ne’e.
Antes ne’e, membru F-FDTL nain 12 ne’ebe tuir kursu lian ingles durante tinan ida (1) hetan ona graduasaun, membru F-FDTL hirak ne’e tuir treinamentu lian ingles iha sentru treinamentu Metinaru, hahu husi nivel 1, 2, to’o 3.
Hataan kona ba problema ne’e, komandante Jeral F-FDTL, Major Jeneral Lere Anan Timur hateten, seidauk iha informasaun klaru kona ba problema ne’e, maibe, kuandu identifika pratika ne’e mosu iha instituisaun nian laran sei foti desizaun forte hodi kombate.
Iha fatin hanesan, Sekretariu Estadu Defeza (SED), Julio Tomas Pinto hateten, la hatene kona ba problema ne’e, problema seluk ne’ebe akontese iha instituisaun F-FDTL mak iha fulna kotuk, membru F-FDTL nain 10 hetan espulsa husi instituisaun F-FDTL, tanba abandona servisu durante tinan barak ona.