Segundu Vise Ministru
Edukasaun (ME) ne’ebe responsabiliza ba Ensinu superior no eskola
tekniku Vokasional, Abel Ximenes “Larisina”, hateten katak, defisil
tebes atu buka professor ba multimedia nian.
“Ita defisil atu hetan professor
multimedia, tantu iha universidade, instituto no eskola sekundaria ita
atu buka professor ba multimedia ne’e susar teb-tebes, maibe sira nia
livru iha ona. Agora dezafiu ba ita mak buka professor ba multimedia,”
hateten Vice ME ne’e liu husi debate publiku ho membru PN, Kuarta
(21/10/2015).
Eis Vise Ministru Comercio Industria no
Ambiente (MCIA) ne’e haktuir tan katak, eskola publiku iha 43, eskola
pribadu 40, alunus ne’ebe frekuenta iha eskola sekundaria jeral iha TL
hamutuk 50.000, husi eskola sekundaria tekniku vokasional iha 27 ho
total estudantes 4.416. Nia esplika liu tan katak, Kona ba materia
multimedia professor sira lor-loron sira ba hanorin, maibe ekipamentus
praktek laiha, kuandu hanesan ne’e oinsa estudante sira bele hatene diak
liu tan.
Iha sorin seluk mos Governante ne’e
dehan katak, oras ne’e dadauk iha professores hamutuk 4.220, husi numeru
ne’e iha numeru ida ne’ebe mak ami hatene ona katak ida ne’e bele
kontinua ninia profisaun hanesan professor tanba nia priense rekejitus
atu bele sai hanesan professor 1 mil resin, enkuantu 3 mil presija atu
hare fila fali forma ida atu bele fasilita sira hodi bele priense
rekejitus atu sai professor ou bele iha posibilidade atu sai sira ne’e
bele dezempenha funsoes administrativas ne’ebe mak rekere iha eskola
sira.
Planu ida ne’ebe Ministeriu trasa hela,
agora dadauk halo hela avaliasaun atu nune’e bele kontribui rezolve
problema professores kontratadus ninian. mia
JNDiario