Iha kampaña eleitorál, partidu
polítiku sira promete sei altera Lei Pensaun Vitalísia (LPV) bainhira
hetan kadeira iha Parlamentu Nasionál no kaer ukun. Hetan tiha kadeira
iha Parlamentu Nasionál (PN), la liga tiha sira nia promesa.
Tanba ida ne’e, konvida emosaun no
asaun. Movimentu Universitáriu Timor-Leste (MUTL) hala’o demostrasaun
hodi ezije PN muda imediata LPV. Realidade hatudu, deputadu sira iha
Parlamentu konsidera seidauk tau iha prioridade no akuza asaun
manifestasaun pasífiku ne’e ilegál.
Tanbasá PN ulun to’os altera lei ne’e?
Partidu Demokrátiku (PD), Frente-Mudansa (FM), FRETILIN ou partidu boot
CNRT maka ulun to’os lakohi muda LPV? Produtividade PN tinan ida produs
lei hira? Será ho durasaun tempu tinan tolu (3) la sufisiente atu altera
LPV?
Deputadu sira ne’e mesak intelektual
de’it, maibé la hanoin kona Timor-Leste nia dependénsia ba fundu
petrolíferu. Tuir estimasaun, maizumenus tinan ruanulu (20) tan fundu
minarai sei maran dekor. Sé agora ita la poupa, krizi ekonomia ruma kona
ita, ita sei monu hakdasak.
Ita tenki kuidadu fakar osan arbiru ba
buat ne’ebé la importante. Presiza haree retornu bainhira fó pensaun
vitalísia no pensaun oi-oin ne’ebé atribui ba idozu sira, veteranus no
sira seluk tan. Fiar katak atribuisaun subsídiu ka pensaun ne’e la fó
vantajen ekonomia ba nasaun tanba nia (pensaun) ne’e gastu ida maibé
la’os reseita ida ne’ebé atu lori reseita mai kofre estadu.
Solusaun ikus maka bele fó pensaun ou
subsídiu maibé tenki redus. Labele haree tanba osan minarai nabubun
maka’as iha banku Amérika ne’ebá be ita iha Timor matan naklosu hodi
fakar arbiru de’it.
Oras ne’e, públiku sira ezije atu altera
lalais pensaun vitalísia ne’e. Hein katak reprezentante povu iha
Parlamentu Nasionál tilun moos rona aspirasaun ida ne’e. Labele iha oin
dehan, ya pak! Maibé iha kotuk dehan, terserah gue. Abrasu. (*)
Matadalan