Prezidente Parlamentu Nasionál,
Vicente Guterres liu-hosi sesaun plenária extraordináriu iha Parlamentu,
Kuarta (07/10/15) deklara katak asaun manifestasaun ne’ebé hala’o hosi
Movimentu Universitáriu Timor-Leste (MUTL) nian ne’e ilegál tanba asaun
ne’e halo iha fatin públiku hanesan Kampus Universidade Nasionál
Timor-Leste (UNTL) no besik fatin públiku sira seluk hanesan Parlamentu
Nasionál, Ministériu Finansas (MF) no Palásiu Governu.
Tanba ne’e, Vicente Guterres haruka
Sekretáriu Jerál PN hodi kontaktu diretamente ba Komandante Jerál PNTL,
Júlio Hornai no Prezidente PN ne’e mós kontaktu direta ba iha Dr. Agio
Pereira ne’ebé hanesan Primeiru Ministru Interinu atu haree situasaun
ida ne’e.
Maske nune’e, polísia la konsege
prezensa tuir pedidu Prezidenti PN tanba konsidera asaun ne’e hala’o iha
área kampus tanba kampus ne’e iha nia otonomia.
Enkuantu, Deputadu David Diaz Ximenes
‘Mandati’ hosi bankada FRETILIN preukupa ho asaun MUTL tanba besik iha
fatin públiku sira. Nia haklaken katak, hanesan sidadaun ida, ema hotu
iha direitu atu halo manifestasaun no partisipasaun polítika, maibé iha
ninia regras ne’ebé konsagra iha Konstituisaun RDTL.
Nia hatutan katak nia la aseita presaun.
Nia husu atu labele halo presaun ba malu. Deputadu sira la’os tilun
diuk, matan laiha no neon laiha.
“Ami deklara ona katak sei halo revizaun
no alterasaun ba lei pensaun vitalísia, maibé la’os iha presaun nia
laran,” Mandati informa.
Manifestasaun ne’e hala’o iha área
Kampus UNTL iha Kuarta ne’e ho objetivu atu nai ulun sira iha Parlamentu
Nasionál no Governu bele rona direta sira nia ezijénsia kona-ba
revizaun ba Lei Pensaun Vitalísia. (Anibal)
Matadalan