Prezidenti
Repúblika (PR), Taur Matan Ruak, lamenta tebes ho joven sira ne’ebé mak
involve-an iha grupu artemarsiais, tanba sira nia hahalok ne’ebé hatudu ba
públiku, halo inan-aman mak terus ba be-beik.
Tanba
ne’e, Xefi Estadu ne’e bandu inan aman sira hotu atu labele fó han oan
sira ne’ebé inan aman ko’aia la rona, hodi lori problema bebeik ba inan aman
sira.
“Fulan
kotuk imi iha problema iha ne’e, sunu uma hira motuk, ha’u husu ba ha’u nia oan
joven sira labele halo tan hanesan ne’e, no ha’u husu ba inan aman sira atu
eduka oan sira, kastigu sira lalika fó han, ha’u nia oan iha uma, nakar ha’u la
fó han, tanba nia mate liu ne’e di’ak, ita lakon, mas sei nia ba kastigu, sé
mak lori hahan ba fó han nian, ita inan aman mak terus,” dehan PR Taur Matan
Ruak ba povu iha Suku Hera, Postu Administrativu Cristo Rei, Munisípiu Díli,
liu husi dialogu komunitária, Tersa (20/12).
Xefi
Estadu ne’e hatutan, kuandu la mate, ain tohar ka isin ruma moras, nia ba toba
iha hospital, inan-aman sira tenki ba hein iha hospital hodi para servisu, mas
kuandu sira isin di’ak, inan aman ko’alia la rona.
“Ha’u
husu ba ha’u nia oan joven sira, imi tenki hatene no imi tenki hanoin katak,
ha’u sorti ona ha’u moris, ema seluk moris mai fulan ida rua de’it mate fali,
ita Maromak fó tiha ona ita moris, ita lakohi goza, ita hakarak estraga ita nia
moris, hatudu jagoan,” katak Taur Matan Ruak.
Xefi
Estadu ne’e hatutan, kuandu oan sira ba halo buat ne’ebé laloos iha liur, inan
aman sira mak terus, pior liutan, sira nia hahalok ne’e, lori problema
ba inan aman no familia.
“Kuandu
imi la fó han sira mak sira lori imi ba tribunal, imi hatete ba tribunal katak,
Prezidenti Repúblika mak bandu ami labele fó han, tanba ami ko’alia sira la
rona,” katak Taur Matan Ruak.
Tanba
ne’e, PR Taur Matan Ruak husu nafatin ba inan aman sira atu kastigu oan sira,
maibé labele baku, kastigu sira labele fó han, tanba inan aman kole ona desde
sira se ki’ik, maibé bo’ot tiha, lori nafatin problema mai inan aman sira.
“Artemarsiais
ne’e, ita labele fo todan ba sira, se Antonio mak sala, ita dehan, ema ne’e mak
sala, ita labele jeneraliza dehan artemarisiais, tanba ida ne’e ema ida rua nia
hahalok,” dehan Taur Matan Ruak.
Xefi
Estadu ne’e esplika, kuandu ema ida rua mak sala, tenki buka meus hodi fó sala
ba sira, labele temi hotu grupu nia naran.
“Konaba
seguransa, iha ha’u nia esperensia vizita Suku barak iha Timor, polisia barak
labele halo, presija involvementu joven sira ne’e mak susesu. Tanba imi joven
iha Suku ne’e mak kuñese malu,” katak PR Taur Matan Ruak.
Tanba
ne’e, Taur Matan Ruak husu ba joven sira atu unidade hodi hametin paz iha Suku
Hera.
Taur
Matan Ruak mós husu ba autoridade local sira iha Hera atu servisu maka’as hodi
buka solusaun ba problema Hera ne’e, tanba laiha problema ida iha Mundu ne’ebe
laiha solusaun.
Purtanto,
iha sesaun husu no hatan, joven Alexandrinho Araújo Amaral husi Suku Hera
dehan, joven sira husi Suku Hera, dala barak moris la hakmatek, tanba problema
sempre mosu hela de’it iha ne'e.
“Tanba
ne’e, ami husu ba Polisia atu haforsa liu tan regulamentu ne’ebé mak iha atu
ami joven bele tauk,” katak Alexandrinho.
Alende
ne’e, Jaime da Silva mós dehan, Suku Hera sai hanesan fatin ba komflitus, tanba
ne’e, nia husu ba Prezidenti Repúblika atu hatete ba Komando PNTL, hodi
fó orden ba Polisia Hera atu hamosu regulamentu ida forte ba artemarsiais sira.
“Iha
fulan kotuk liu ba, akontese situasaun bo’ot ida iha Hera, relasiona ho
artemarisias. Tanba ne’e, ami husu ba Parlamentu atu hamosu lei ida hodi regula
artemarsiais, i labele halo de’it suspensaun,” dehan nia.cos
Jornal
Nacional