Horibainrua
iha Estadus Unidus, veteranu amerikanu rihun ba rihun mak bá North Dakota hodi
apoiu luta Pasífiku ema indíjina nian (Standing Rock Sioux) atu defende
sira-nia soberania no proteje sira-nia rai no bee. Ha’u haree veteranu sira
hakru’uk no husu deskulpa ba komunidade no tribu indíjina barak ne’ebé hamutuk
iha fatin ne’ebá. Sira husu deskulpa nu’udár veteranu husi militár ida-ne’ebé
hala’o jenosídiu tinan atus 5 kontra ema indíjina amerikanu. Nune’e, veteranu
sira rekoñese pasadu no afirma sira-nia kometimentu ba oin atu asegura pasadu
moruk ne’e la bele repete.
Iha
loron ida-ne’e, 7 dezembru, ha’u hakru’uk no husu deskulpa ba krime sira-ne’ebé
ha’u-nia governu halo kontra Timor-Leste -- la’ós iha loron ne’e de’it, iha
tinan 1975, maibé durante tinan 24. Ha’u husu deskulpa tanba to’o agora,
ha’u-nia governu seidauk loke ba públiku dokumentu hotu ligadu ba ninia
relasaun ho Indonézia no seidauk rekoñese iha maneira ofisiál no responsavel,
ninia apoiu ba krime sira iha-ne’e.
Nu’udar
sidadaun EUA, ha’u iha responsabilidade atu aprende kona-ba injustisa ne’ebé
ha’u-nia governu halo – iha pasadu, agora daudaun, no ninia planu ba oin. Maski
ha’u-nia governu gosta subar hela, maibé ha’u sei bele hetan tanba informasaun
barak ema hotu bele asesu, no ema iha EU sei bele ko’alia livre. Ha’u mós iha
responsabilidade atu halo asaun hodi hasoru injustisa ne’e.
Iha
EU, ema barak liu rekoñese ohin nu’udar Pearl Harbor day 1941 – loron ne’ebé
Japaun soi bomba sira iha Hawaii - hahú envolvimentu ativu iha funu mundiál
daruak (WWII). Japaun ataka baze militár de’it no hatene ona katak EU kuaze
prontu atu tama funu kontra Japaun. Maibé iha Timor-Leste, Indonézia nia
invazaun ataka povu hotu ne’ebé lakohi funu ho Indonézia. Ema Amerikanu maioria
la hatene kona-ba Timor-Leste, maibé iha loron ne’e tinan 1975, invazaun
Indonézia nian la bele akontese se Indonézia la hetan apoiu militár, ekonómiku
no diplomátika husi EU.
Husi
6 dezembru 1975, loron antes invazaun, to’o 1999, EU suporta Indonesia nia
invazaun no okupasaun, nune’e iha responsabilidade ba krime grave sira ne’ebé
akontese iha-ne’e. Tuirmai ne’e mak faktu báziku balu:
6
Dezembru 1975: Prezidente EU Gerald Ford no Sekretária do Estadu Henry
Kissinger hasoru Suharto iha Jakarta no autoriza (lampu hijau) ba invazaun
maibé husu Indonézia atu hein to’o sira sai husi Indonesia no bá fali EU.
7
Dezembru 1975: Indonézia halo invazaun no kuaze armas hotu (90%) ne’ebé uza mak
EU nian (U.S. State Department).
Dez
1975-1976: Prezidente Ford nia Embaixadór ba ONU, Daniel Patrick Moynihan,
hakerek ho orgullu kona-ba ninia papél formál no ofisiál atu asegura katak ONU
la bele halo buat ida kona-ba kazu Timor-Leste.
Janeiru
1976: Liafuan husi ofisiál U.S. State Department nian: "In terms of the
bilateral relations between the U.S. and Indonesia, we are more or less
condoning the incursion into East Timor. . . . The United States wants to keep
its relations with Indonesia close and friendly. [It's] a nation we do a lot of
business with." (“Refere ba relasaun bilaterál entre EU no Indonézia, ami
maizumenus apoia invazaun/ataka ba Timor-Leste…EU hakarak mantein relasaun
di’ak no belun ho Indonézia. Ami halo negósiu/komérsiu barak ho [Indonézia].”)
1977:
Prezidente Jimmy Carter (ne’ebé povu Amerika rekoñese nu’udár ‘the human rights
president’) aumenta apoiu militár ba Indonézia, inklui autoriza fa’an armas no
ekipamentu funu nian ho kustu US$112 millaun.
10
Dezembru 1991: Staff husi Administrasaun Prezidente Bush hasoru lider militár
indonezianu no reforza sira-nia apoiu ho liafuan ne’e: "we do not believe
that friends should abandon friends in times of adversity." (Ami la fiar
katak belun bele abandona belun iha tempu dezgrasa nian.)
1992-1999:
Ativista sira (povu) no kongresista balu halo presaun maka’as kontra governu
nia apoiu ba okupasaun ho rezultadu hatún kuantidade apoiu militár. Maski
nune’e, Prezidente Bill Clinton sei konsege autoriza fa’an armas maizde dolár
millaun atus ba atus, no fó apoiu ekonómiku maizde millaun US$500.
4-9
Setembru 1999: Maski militár Indonézia ho sira-nia milisia oho ema barak no
harahun infrastrutura Timor nian, Prezidente Clinton lakohi hapara EU nia apoiu
militár no ekonómiku ba Indonézia. Embaixadór EU nian ba Indonézia, Stapleton
Roy, dehan ba jornalista sira: "Indonesia matters, East Timor does
not." (Indonézia mak importante, la’ós Timor-Leste.) Só iha loron 10
setembru, ho presaun maka’as husi povu no membru Kongresu balu, Prezidente
Clinton deklara atu para apoiu ekonómiku no relasaun militár ho Indonézia.
Ha’u-nia
governu seidauk responde ba rekomendasaun báziku husi relatóriu Chega! ne’ebé
ko’alia diretamente ba governu EU; seidauk rekoñese akontabilidade lider
governu EU nian iha krime sira; seidauk fó reparasaun ba Timoroan sira, no sei
kontinua ho polítika ne’ebé promove relasaun internasionál sira-ne’ebé defende
no promove interese privadu (kompañia sira nian) no ema riku nian.
Agora
Fidel Castro mate no Donald Trump sei sai prezidente EU. Iha Cuba, la eziste
hamlaha no ema hotu iha uma no bele hetan tratamentu saúde nian. Iha EU, populasaun
17% dala ruma hamlaha no pelumenus ema na’in millaun ida la iha uma.
Maski la iha sistema saúde ba povu hotu, sistema fraku ne’ebé eziste
agora hetan ameasa husi Trump ne’ebé hakarak sobu.
Maski
Cuba ladún iha barak, sira haruka médiku barak no apoiu barak atu dezenvolve
sektór saúde iha nasaun barak inklui Timor. EUA, ne’ebé iha osan barak, fó
ajuda uitoan de'it no konsentra liuliu ba komérsiu no funu nian. No ba mundu,
EU sei haruka armas no apoiu militár barak lahalimar.
Nu’udár
sidadaun EUA, ha’u rekoñese hotu ne’e no haforsa ha’u-nia kometimentu no
solidariedade nu’udár indivíduu, nu’udár ativista no nu’udár membru ETAN, atu
luta kontra injustisa sira-ne’e hodi bele iha akontabilidade no justisa. Liuliu
atu luta ba governu ida-ne’ebé fó prioridade ba povu no umanidade, la’ós ba
kompañia, negósiu no ema riku. Sei kontinua husu ha’u-nia governu atu:
Loke
dokumentu hotu ne’ebé governu EU rai hela ne’ebé liga ba Timor-Leste husi tinan
1974-1999, inklui dokumentu intelijénsia no komunikasaun ne’ebé foti subar
entre parte militár.
Kria
komisaun independente ho kbiit atu investiga, analiza no fó-sai relatóriu
ofisiál kona-ba envolvimentu EU iha Indonézia nia invazaun no okupasaun iha
Timor-Leste.
Fó
apoiu ativamente prosesu tribunál internasionál ka mekanizmu ne’ebé bele
asegura akontabilidade ba autór krime sira hotu.
Kumpre
rekomendasaun sira hotu husi relatóriu Chega! hanesan la fó visa ba ema militár
ida-ne’ebé nia naran mosu iha relatóriu nu’udár autór violénsia, no hapara
fa’an armas no ekipamentu militár se violasaun direitus umanus sei kontinua
(hanesan iha West Papua agora).
Husu
deskulpa ba povu timorense tanba EU apoia maka’as ba Indonézia nia krime sira
durante invazaun no okupasaun.
Hahú
diskusaun ho reprezentativu sira Timoroan iha sektór oioin kona-ba reparasaun
husi governu EU ba povu Timor-Leste.
A
luta kontinua…
Pamela
Sexton
Kontaktu
7744 9793
Fonte
informasaun: Nevins, Joseph. A not-so-distant horror: mass violence in East
Timor, Cornell University Press, 2005