Jornal Nacional Diario - Sesta, 15 Junu 2012
Partidu
CNRT lamenta ho deklarasaun Lauriado Nobel da Paz Jose Ramos Horta nebe
iha kampania eleitoral iha Covalima atu nasaun ne’e lao ba oin mak
rejultadu eleisaun ba ukun ne’e labele monu ba CNRT nia liman.
Deklarasaun eis Prezidenti
Republika nebe mos nudar Lauriado Nobel da Paz, Jose Ramos Horat ne’ebe
fo sai iha kampania ne’e, CNRT hatete Ramos Horta lamerese ona lori
Nobel da Paz.
"Ramos Horta la merese ona leba
naran Nobel da Paz, simbulu unidade nasional, tamba atributu sira ne’e
laiha ona nia fatin, deklarasaun ne’ebe nia halo la refleta ona konseitu
unidade nasional no rekonsiliasaun nasional," deklara Koordenador
mobilizasaun massa Komisaun Organizadora Kampania Parlamentar (KOKP)
CNRT, Aderito Hugo da Costa ba Jornalista sira Kinta (14/6) sede CNRT,
Bairo dos Grilos, Dili.
Partidu CNRT konsidera, Ramos
Horta uza linguazen ida ne’e atu bosok povu katak nia ema independente,
maibe povu matenek hatene no nota nia laos independente ona.
Aderito haklaken, Eis PR Jose
Ramos Horta ninia prezensa iha Partidu Demokratiku (PD) ne’e sei la
akontese tamba ninia prezensa halo deit konfrontasaun.
"Ramos Horta agora koko atu
hasa’e votus ba PD maibe ami triste ba nia no mos ba militantes PD iha
Timor-leste tanba afinal prezensa Horta nian laos ba ho programa
konkreta atu hamutuk ho PD, Horta nia prezensa atu halo deit konfronta
ho CNRT," deklara Hugo.
Nune’e mos, Aderito Hugo
Preokupa deklarasaun Prezidenti Partidu Demokratiku (PD) Fernando la
sama de Araujo ne’ebe dehan, tempo ona fo votus ba jerasaun foun para
ukun rai ne’e, konsidera deklarasaun refere lalos, tanba Timor-Leste sei
presiza lideransa antigu sira.