NOTISIA TEMPO-SEMANAL
Sekretáriu Jerál
Fretilín Mari Alkatiri ho hanoin ne’ebé di’ak atu lori Nasaun ne’e, ba oin. Jerasaun
tuan tenke hamutuk hodi bele kria estabilidade no pás hatudu dalan ba jerasaun
foun iha futuru. Atu hatene di’ak liu tan kona ba kestaun hirak ne’e tuir mai
akompaña hamutuk inter vista eskluzivu ne’ebé hala’o husi jornalista Tempo
Semanál foin lalais ne’e.
Oinsá
ho lideransa jerasaun Tuan bele hamutuk?
Ha’u fó apelu ba jerasaun tuan tinan 1974-1975. Di’ak liu kolia hanesan ne’e. Tanba, ami mós sei envolve iha polítika. Ha’u hanoin tempu too ona atu ita atu fila-fali ba saida mak ita hala’o uluk hamutuk hanoin povu nia interese.
Ita labele hanoin katak, ita ida-idak mak di’ak liu da seluk. Ha’u hanoin ha’u di’ak liu Xanana Gusmão, hanoin di’ak liu ema hotu. Ne’e, ita sei la lori ba fatin ida. Se bele akontese. Ema oportunista sira mak aproveita situasaun entre divizaun jerasaun tuan atu sira mak ukun fali rai ne’e.
Ha’u lakohi kolia buat sira ne’e. Se lae ema dehan, ha’u ofende ema seluk. Mais realidade mak ne’e, se ami fahe malun nafatin saida mak akontese oportunista haksoit ba oin sira mak kontrola ami balun no bele ukun rai ida ne’e.
Reflesaun
Saida Mak Ita Boot Hala’o Too Agora?
Ha’u hanoin ne’e, atu hatudu mós katak, saida mak ha’u hala’o dezde 2007 too agora. Primeiru ha’u hala’o reflesaun boot ida ba krize 2006-2007. Segundu lugar ha’u foti ha’u nia konkluzaun. Ha’u nia konkluzaun katak, ita rasik mak lori demokrasia mai rai ida ne’e.
Jerasaun tuan Fretilín lori demokrasia mai ona iha ne’e. Soke ita nia interpretasaun ba demokrasia mak laloos. Ita hanoin demokrasia ne’e, hanesan atu fahe malun. Demokrasia la’ós atu fahe ita. Demokrasia fó ita liberdade atu hanoin no fó ba ita atu halibur grupu ida. Maibé, tenke hare posibilidade ne’ebé boot liu interese Nasionál. Posibilidade grupu partidu nia ne’e, importante atu haburas demokrasia. Posibilidade ida boot ne’e, interese Nasionál ita tenke hare. Tanba povu ne’e sei kiak no mukit. Povu iha mehi nafatin atu kore nia an husi kiak.
Saida mak ita bele hala’o hamutuk ba buat ida ne’e. Ne’e mak interese Nasionál. Se ita halimar demais hanesan demokrasia. Saida mak bele akontese agora osan mak manda. Se osan mak manda ona demokrasia mate ona.
Tanba, ita la respeita ona povu nia votu. Ita aproveita povu nia kiak. Ita sosa povu nia votu. Ne’e la’ós demokrasia. Ne’e, mak ha’u hanoin se mak ami jerasaun tuan tinan 1974-1975 la iha korajen no tuur hanoin buat ne’e loloos. Se aban bainrua ami ba ona demokrasia iha Timor la iha ona.
No ema ne’ebé lori osan mai husi rai li’ur mai sira mak komanda fali ita. Ha’u mós ema balun mai kolia ho ha’u hakarak asina memorandu ida atu fó milioins mai ha’u. Ha’u dehan, ba sira dala rua.
Primeiru ami nia Lei la promete partidu polítika simu orsamentu husi rai li’ur Lei la fó dalan ba ida ne’e. Mais, liuliu ha’u nia prinsípiu se ha’u manan iha Eleisaun depois sai fali imi nia administradór ne’e mak ha’u lakohi. Se imi mak fó osan mai ha’u. Ha’u mak sei sai imi nia administradór ne’e ha’u lakohi.
Bele
ou Lae Jerasaun 1974-1975 Sai Ezemplu?
Tanba ne’e, ha’u hateten atu evita buat ne’e atu sai fali Kultura polítika iha Timor. Jerasaun 1974-1975 tenke sai ezemplu di’ak. Labele fó dalan ba buat ne’e, sai hanesan Kultura.
Advezes ita manan de’it podér halo kompromisu oioin de’it. Tanba, ita hakarak hetan podér. Podér ne’e, ita interpreta katak povu mak entrega kadeira ba ita. Atu serve povu la’ós atu ukun povu. Ne’e mak ha’u nia reflesaun no konkluzaun. Oras ne’e daudauk ema hotu-hotu dehan, biar partidu barabarak husu Xanana iha ne’ebé, Mari Alkatiri iha ne’ebé no Ramos Horta iha ne’ebé.
Entaun, se todan ne’e mai ami na’in tolu. Ami na’in tolu lori todan hanesan ne’e de’it ba rai ko’ak ou ami simu todan ne’e ho responsabilidade. Atu aban bainrua entrega todan ne’e ba jerasaun foun ho hahalok ida ke di’ak no sai ezemplu. Se jerasaun foun aban bainrua tuir ami nia hahalok. Se mak sala ami mak sala dunik.
Lakohi
Jerasaun Tuan Hatudu Ezemplu ba Jerasaun foun sira. Dalan Di’ak Saida Mak Ita
boot Na’in Tolu Sei Uza?
Ha’u uluk halo proposta ona ba Xanana no Ramos Horta sei sai hanesan Presidente Repúblika iha tempu ne’ebá. Ha’u sempre dehan, ita halo revizaun ida ba Instituisaun iha depozisaun de tranzitóriu no hari konsellu tranzisaun.
Inves luta ba sai Primeiru Ministru no Presidente Repúblika. Konsellu Tranzisaun ho ninia kompeténsia monotoriza no ajuda Governu atu ukun di’ak liu. Ajuda rezolve Veteranus sira nian.
Ajuda rezolve ferik katuas sira nian. Maibé, fó mós dalan ba Governu Independénsia atu hala’o planu dezenvolvimentu. Maibé, ho pás no estabilidade. Se ami na’in tolu hamutuk iha Konsellu Tranzisaun. Pás no estabilidade garantia. Ne’e mak ha’u halo ha’u nia proposta. Ha’u dehan dunik ba irmaun Xanana. Se ita boot sai Primeiru Ministru ha’u sai opozisaun ha’u kritika ita boot.
Se ha’u sai Primeiru Ministru ita boot atu sai fali opozisaun. Kritika fali ha’u. Entaun, se ita hamutuk. Se atu kritika ita. Mais ke ami la ukun. Maibé, hala’o de’it monotorin, ami mós bele ajuda Governu bele ukun ho di’ak liu.
Se
Ita La Hamutuk Ema Balun Aproveita. Maibé, Iha Opiniaun Balun Hateten, Na’in
Tolu Sai Fatór Dezestabilizadór No estabilizadór ba Nasaun Ne’e Nian?
Se mak bele destabiliza nia mak estabiliza ita hare iha tinan 2006 balun destabiliza no balun estabiliza. Ha’u la’ós gaba ha’u nia an. Mais, ha’u tun atu estabiliza ha’u sai husi Governu atu estabiliza. Se ha’u hakarak destabiliza ne’e rahun liu ona no durante tinan lima AMP nia ukun.
Ami sempre dehan, ami la rekoñese Governu. Mais, lideransa Fretilín klaru la iha violénsia. Lakohi dudu povu ba mate atu ita manan de’it kadeira mamar ne’e mak Fretilín hatudu. Ne’e ema ida labele nega. Ne’e realidade.
Agora ita mai fali iha Eleisaun foun hotu-hotu hakarak manan. Se mak hakarak lakon. Maibé, se kuandu dehan, se mak manan de’it povu manan. Entaun, povu atu manan jerasaun tuan tenke iha leten. La’ós atu sai fali Primeiru Ministru no Presidente Parlamentu tenke iha leten atu akompaña prosesu ne’e tomak. Dezenvolvimentu atu bele garante estabilidade ba Governu. Ne’e mak ami nia funsaun agora fó dalan ba estabilidade. Atu nune’e, dezenvolvimentu bele la’o ba oin.
Klaru katak, ida-idak iha nia área. Prontu, ha’u nia orientasaun no background Manejer. Ha’u bele fó konsellu ba Governu. Xanana ita bele dehan, iha kontra no iha influensia barak ba povu atu hametin pás no estabilidade.
Ramos Horta ema ida figura Internasionál. Se ami na’in tolu mak bele hamutuk Governu ne’e la’o ba oin. Ne’e ha’u la iha duvida. Agora ida hanoin nia hakarak sai Primeiru Ministru. Entaun ita sei luta nafatin hanesan. Se aban bainrua jerasaun foun simu husi ami hahalok ida ke la di’ak la koloka ita nia interese Nasionál iha leten.
Bele ou Lae Na’in Tolu Hamutuk iha Governu. Kontrolu Sosiál no Internasionál Nian?
Problema ke ita labele hala’o Eleisaun. Mais, se ita hala’o ona Eleisaun. Maioria sira ne’ebé vota ita labele hala’o sira sai frustradu. Porké, se vota ba CNRT maioria. Se Xanana mak sai Primeiru Ministru. Ne’e bele dehan subsídiu polítiku ba CNRT hanesan mós ba Fretilín. Se vota ba Fretilín nia ema la sai Primeiru Ministru ne’e subsídiu ba Fretilín. Se ema frustradu mak hakarak oho an.
Partidu mós hanesan partidu ida lakohi oho an. Tanba ne’e, vida partidária husi nia la’o nafatin. Agora se mak bele garante pás no estabilidade hodi ajuda Governu ba estabilidade na’in tolu. Ne’e mak tenke hamutuk labele hakarak sai Primeiru Ministru no Presidente la diskute ona. Mais, ha’u nia ideia atu lansa ba públiku. Tanba, ema labele hanoin katak, ha’u hakarak sai Primeiru Ministru. Se ha’u nia ideia la simu pasiénsia.
Oinsá
Ho Lia Fuan Ida Katak, Fretilín Manan Atu Hasai Xanana Husi Tahu Laran no
Hakarak Xanana ba Primeiru Ministru ?
Ne’e, sala. Tanba, Fretilín manan konvida Xanana ba fali Primeiru Ministru ne’e, Fretilín oho an. Militante sira sei lakon konfiansa ba lideransa Fretilín. Ha’u nia interpretasaun hasai Xanana husi tahu laran. Konsellu Tranzisaun atu duni buat ida ne’e. Atu ami na’in tolu hamutuk hodi hala’o monotorin no ajuda Governu atu hala’o ninia servisu.
Ne’e
Signifika, Tempu Too Ona Fó ba Jerasaun Foun ?
Sin, ita hare de’it ba ezemplu Nelson Mandela nia ukun tinan lima de’it nia hakiduk. Oras ne’e, daudauk ninia opiniaun ema hotu-hotu sei rona. Nia katuas liu ami ona. Ami, kuandu seidauk too tinan neen nulu. Ami nia saúde mais ha’u hatene ha’u nia saúde di’ak liu sira.
Ne’e doutór sira mak hateten mai ha’u. Maibé, too sinkuenta anus ami sei aguenta ho ami nia konxiénsia tomak. Maibé, too tinan sesenta ami sei aguenta ho ami nia konxiénsia no kapasidade tomak. Saida mak ita atu hala’o hamutuk ?
Ita tenke hala’o hamutuk. Uluk mak ita la hamutuk la manan. Agora partidu hotu-hotu mai hamutuk la signifika partidu sai ida de’it. Maibé, ita nia forsa morál background polítika. Buat sira ne’e hotu tenke uza didi’ak. Atu bele ajuda rai ne’e la’o ba oin.
Ema balun dehan, lider istória ha’u la simu ida ne’e. Istória ne’e lori ba pensiun ona. Mais ha’u seidauk no ha’u mós lakohi tama iha polítiku partidária ne’e hanesan. Ne’e mak prinsipál. Prinsipál ba rai ida ne’e, la’ós konflitu deferénsia polítika partidária ne’e la’ós prinsipál.
Oinsá
Haburas Demokrasia ?
Ne’e haburas dunik demokrasia. Prinsipál ba rai ne’e, pensamentu komún. Hanoin ida ke hanesan ho estratéjika. Ezemplu, Dezenvolvimentu Nasionál hahú husi ne’ebé. Infraestrutura, Edukasaun no Saúde. Orsamentu hira mak ita tau ba iha ne’ebá atu bele garante dezenvolvimentu ne’e susentavel .
Infraestrutura saida mak prioridade ita hanoin buat sira ne’e hamutuk. Mais liuliu pás no estabilidade. Ita labele uza Veteranus sira nia problema. Atu destabiliza Fretilín too agora la uza hatene katak buat sira ne’e sala hotu. Ema balun Veteranus balun simu ona osan. Maibé, Veteranus loloos seidauk simu Fretilín nunka uza hala’o polítika.
So agora ba Eleisaun Fretilín kuandu ukun fila-fali sei rezolve. Maibé, Fretilín mak hakarak uza uluk kedas ne’e susar tebes ba Governu. Tanba, ha’u dehan, dala ida ba maun Xanana. Ne’e, kestaun ida ke de prinsípiu labele ita uza fali polítika. Kestaun Veteranus no ferik ho katuas ema hotu tenke konsidera kestaun Nasionál la iha dalan ida atu hale’u fali buat ida ne’e.
Ema
Balun Hateten Jerasaun Tuan Sira Hein Atu Tama Iha Kaixaun De’it. Maibé, Buat
Di’ak Ne’ebé Sira Husik Mai Ita Mak Ataka Malun Liu Husi Públiku ?
Ami iha koordenasaun. Ha’u dehan sempre. Ha’u la fiar iha lider ida ke hakarak rai ne’e krize hanesan 2006. Ha’u la fiar. Tanba, ema hanoin katak, ha’u mak sai vítima ba 2006-2007 ne’e hanoin sala.
Ha’u klaru husik dunik kargu hanesan Primeiru Ministru. Maibé, ha’u kontinua ativu sai vítima. Tanba, ha’u laba hela iha tenda okos. Vítima sira mak hela iha tenda okos. Labarik barak mate sira mak sai vítima. Ita hakarak fali repete fali buat ida ne’e.
Tanba, ha’u hela iha uma ne’e ho seguransa tomak. Maski, kalan toba la dukur. Tanba, ha’u hanoin de’it mak problema. Mais la’ós problema seguransa. Sira iha IDPs sira hela durante tinan ida resin sira mak vítima. Ita lalika repete fila-fali aventura ne’e halo ema rihun ba rihun sai vítima iha ita nia rai.
Ha’u nia reflesaun iha baze. Se mak sai vítima iha krize 2006. Ne’e mak ha’u hanoin diskursu ne’ebé hala’o durante ne’e, la iha koordenasaun. Maibé, ida-idak ninia konxiénsia katak, tempu too ona atu labele ataka malun.
So falta de’it mak jerasaun 1974-1975 atu sai nafatin ukun na’in signifika ukun formál ou atu serve povu sai Referénsia Morál no polítika. Ne’e mak importante ita hare buat ne’e. Atu formalmente ha’u Primeiru Ministru ou atu sai de’it Referénsia Polítika ba jerasaun foun.
Karik
Fretilín Manan?
Se Fretilín manan maun Xanana mós simu ha’u nia ideia ne’e. Se maun Ramos Horta hatene simu. Ha’u nia pozisaun nafatin. Porké ha’u propoin tiha ona antes iha Maubesi. Ha’u kuandu husu Don Basílio do Nascimento atu halibur ami iha Maubesi ha’u nia ideia mak ida ne’e dunik. Ha’u dehan dunik ba Don Basílio iha fulan Abríl 2008. Enkuantu ami na’in rua ou tolu ne’e. Se deskonfia malun no la iha konfiansa ba malun.
Biar ha’u kolia buat ida ke sai husi fuan no laran. Ne’e Xanana sei hanoin nafatin. Ne’e nia bosok no buat ruma iha kotuk. Xanana se kolia ho ha’u mós ha’u dehan. Ema ne’e lohi door. Ramos Horta mós ‘pling-plang.’ Ita se hanoin ba malun hanesan ne’e nafatin. Ne’e mak labele kontinua.
Atu labele kontinua labele sai fali podér polítiku ou kontrola podér ita hela de’it Autoridade polítika umanu ne’e mak Referénsia ona. Autoridade buat ida no podér buat seluk. Podér ne’e Lei mak fó, Autoridade istória mak fó mai.
Presidente
CNRT no Sekretáriu Jerál Fretilín Manan La Ba Tuur Iha Governu Oinsá?
Ha’u hanoin povu kontente. Ami hotu dehan, lae, ami la ba Governu. Maibé, ami na’in tolu ba apoiu Governu povu tomak sei kontente. Ha’u kuandu halo apelu iha ha’u nia kampaíña hotu-hotu ema hotu-hotu basa liman. Ne’e hatudu povu hakarak. Balun husu ba ha’u. Se Fretilín manan dunik imi atu hala’o saida ho Xanana.
Ha’u dehan uluk iha 2007 la iha ema ida mak husu hala’o sai ho Mari Alkatiri. Ami ne’e iha ona Autoridade ona. Se ami hakarak simu ho Autoridade labele hanoin nia la’ós Primeiru Ministru nian mate ona lae. Ami sei nafatin.
Agora se ami la proteza nafatin ami nia Autoridade ne’e. Entaun aban bainrua ami lakon Autoridade. Kuandu lakon Autoridade ona biar atu ukun ema la respeita ona.
Ema
Hahú Kolia Jerasaun Tuan Lakon Identidade. Tanba, La hamutuk. Maski Uluk Mai
Husi Abut Ida no Hun Ida?
Tebes duni uluk se ami dehan, ami la hamutuk la iha demokrasia. Ne’e ha’u fiar. Se ami mak hamutuk iha partidu ida demokrasia la iha. Ida-idak ho ninia partidu. Maibé, hamutuk iha estrutura Nasionál ida.
Estrutura la’ós iha Governu. Estrutura la’ós atu kaer ukun lae. Atu akompaña no ajuda. Se mak kaer ukun hanesan iha Parlamentu, Governu no Presidente Repúblika inklui mós tau matan ba prosesu justisa ami na’in tolu ne’e bele fahe malun ba buat sira ne’e.
Se mak tau matan ba ida ne’e no ne’ebá. Maibé, labele dehan, komanda fali Governu ne’e la’ós komanda sentrál. Ne’e konsellu de Tranzisaun ninian objetivu atu garantia tranzisaun la’o di’ak ba iha jerasaun ami nian no ba jerasaun foun.
Mosu
Informasaun Katak, Jerasaun Tuan Mak Sei Kaer Ukun Nafatin ?
Se ami hotu hamutuk. Uluk ami hamutuk iha podér mak krize 2006 mosu. Ne’e mak di’ak liu mak ne’e. Tanba, Primeiru Ministru Mari, Presidente Xanana, Presidente Parlamentu Lu-Olo no Ramos Horta Ministru Negósiu Estranjeiru. Maibé, mosu nafatin problema.
Agora ami na’in tolu fali mak hamutuk fali atu rezolve problema. Ha’u la fiar. Tanba, ami ninia hanoin la hanesan. Ha’u gosta servisu ho planu no programa. Xanana nia gosta de’it la hanesan halo buat ida ho emerjénsia. Agora Ramos bele kaer nafatin ninia prinsípiu Internasionál.
Maibé, figura rua ne’e. Se partidu ida mak manan nia mak tenke hatudu ba Primeiru Ministru Xanana hakarak sai Vice Primeiru Ministru ha’u la fiar katak, Xanana sai Vice PM.
Hare ba istória ha’u respeita istória Xanana nian nia hanesan lider Rezisténsia. Maibé, hare ba background ba istória ha’u fundadór sasan hotu-hotu iha ne’e. Fundadór ba Fretilín no Falintil no Nasaun ida ne’e.
Tanbasá Xanana lakon nia mak sa’e fali PM ha’u mak Vice PM. Tanba de’it idade ne’e ha’u hanoin demokrasia komparativu ona.
Ukun ida kuandu ita viola ona regras demokrasia. Ukun se la la’o ba oin. Porké Xanana PM nia mak komanda. Maibé, ha’u nia vota barak liu o ne’e.
Tuir
Deklarasaun Iha Kampaíña Hateten, Mezmu CNRT Hetan Kadeira Tolu De’it Fretilín
Prontu Hala’o Koligasaun?
Lae. Ha’u dehan, nune’e. Se Fretilín imi presiza kadeira tolu de’it. Fretilín sei hala’o koligasaun ho sira. Maibé, Fretilín presiza kadeira sanulu no CNRT iha koligasaun sanulu Fretilín sei hala’o koligasaun ho CNRT ou partidu seluk.
Ne’e mak ha’u dehan. Porké koligasaun ne’e, kuandu presiza kadeira tolu labele ba hala’o koligasaun ho segundu partidu ida la too tarjetu. Ne’e mak problema sei iha Governu. Kuandu ha’u iha trinta kadeira ha’u ba buka partidu ida ke iha kadeira tolu. Atu maioria iha Governu ne’e bele la’o estavel liu.
Agora partidu boot rua mak forma Governu estabilidade komplikadu iha diskusaun Governu nia laran. Biar nune’e. Tansá ha’u nia duvidas sira ne’e. Tanba, CNRT la’ós Xanana. Se Fretilín atu ukun ho CNRT 50%-50%. Se mak mai husi CNRT atu sai membru Governu ne’e mak ha’u nia duvidas. Ha’u problema ho Xanana nia ukun la hanesan. Maibé, jerasaun 1974-1975 buka ona tau sira nia an iha leten atu hala’o monotorin.
Karik
Iha Problema Entre CNRT ho Fretilín ?
Ita hare de’it ba iha kampaíña Fretilín la kritika ba Governu. Maibé, Fretilín hala’o de’it balansu membru Governu mak kritika malun sira mak dehan, iha korrupsaun barabarak. Balun hateten, Governu ne’e aat liu fali Governu uluk sira mak kritika malun.
Tanba saida. Tahu dunik, kuandu buat ida kuandu iis boot ema sira iha ne’ebá mós la aguenta ona. Kuandu ema ida mak book demais sira mak Fretilín hala’o de’it nia programa kritika nafatin governasaun ida ke la iha rezultadu.
Tinan sanulu, tinan lima Fretilín nia ukun ho osan lima ratus juta iha AMP nia ukun lima miliar rezultadu mak ne’ebé. Ne’e ema labele kritika ha’u. Mais mai ho balansu de’it. Ha’u nunka kritika diretamente ho Xanana hanesan Primeiru Ministru A, B ou C. Agora sira ho sira mak dun malun. Entaun, signifika saida mak ha’u dehan, tahu.
Tinan tolu ba kotuk ha’u dehan ba, ha’u nia kamarada sira imi lalika preokupa nufin sira mak sei dun malun. Primeiru Ministru rasik hateten adeus AMP bem vindu CNRT. AMP la moris CNRT la iha.
Ne’e deklara dala barak iha kampaíña CNRT sai inan no aman ba AMP. AMP mak sai aman ba korrupsaun no nepotizmu. Maibé, nia avó mak CNRT ne’e labele halai husi buat ida ne’e. Ha’u la’ós dehan Xanana mais CNRT. Ne’e dunik, tranzisaun ne’e importante.
Kona ba Tranzisaun Tuir Ita Boot Nia Hare Jerasaun Foun Prontu Ona ?
Uluk. Kuandu, ami hahú ami mós joven. Maski la hanesan. Ami hahú la iha jerasaun tuan ida ba ami. Ami konsege lori rai ne’e ba Independénsia. Kontinua dehan de’it, jerasaun foun seidauk prontu.
Ne’e sala ami nian dunik. Tanba, ami kontinua atu sai fali blokeamentu ba jerasaun foun. Ami blokeiu fali jerasaun foun uza sira nia kredibilidade no kapasidade bele hala’o sasan ida ke di’ak liu ba rai ne’e.
Agora ha’u mós tenke rekoñese ema balun husi jerasaun foun hetan oportunidade sai ukun na’in sira mak halo aat fali jerasaun foun nia naran. La’ós ami mak halo aat. Sira rasik mak matan lakan ba osan.
Halo aat jerasaun foun nia naran. Mais ne’e sira. Labale hanoin katak, jerasaun foun hotu-hotu hanesan sira ne’e. Ita hatene ona sira. Se ita tenke hatene sira. See no fó oportunidade ba jerasaun foun.
Agora se Fretilín manan ha’u la sai Primeiru Ministru entaun ha’u ba buka joven ida ho tinan 25 sai fali PM lae iha. Se ha’u hamutuk ho Xanana no Horta fó apoiu ba nia sei afirma nia an hanesan PM ida ke di’ak. Agora se ha’u husi kotuk sona fali nia. Entaun, nia labele nafatin.(ts)