Jornal Nasional Diario - Segunda-Feira, 23 Jullu 2012
Xefi Suku Becora Antonio Soares da Silva deklara katak, bairo neebe nia lidera laos bairo konflitu, maibe bairo paz ho unidade.
Nia esplika, aksaun anarkismu ne’ebe akontese iha Terminal Becora laos pasparte Suku Becora nian, maibe suku Camea nian.
“Hau hamutuk ho populasaun sira hotu tantu ba ferik katuas, joventude no labarik sira, hahu husi Primeiru no segundu eleisaun presidensial I no II, pois avansu tan iha eleisaun Parlamentares ninian, to’o agora suku Becora la’o hakamatek, laiha problema tanba ami hotu iha ne’e hamutuk hela no haree malu diak, tanba ne’e hau husu ba maluk media sira hotu atu interpreta lolos, wainhira problema mosu iha fatin ne’ebe, temi los fatin ne’e nia naran, labele temo fali Becora, se lae ami nia joventude mak naran foer hela deit,” esplika Antonio Soares ba ba Jornalista sira iha konferensia da imprensa ne’ebe halao iha salaun parokia Becora, Dili.
Nudar lideransa maximu iha Suku Becora, Antonio fiar katak, iha Suku Becora Inan aman no joventude sira hakribi violensia, ida ne’e sira prova ona katak, wainhira violensia mosu iha kapital Dili, situasaun iha Becora hakmatek no paz.