Jornal Nasional Diario - Segunda-Feira, 23 Jullu 2012
Juventude FRETILIN husu ba ema tomak iha rai doben Timor-Leste (TL), atu labele hakribit no nega FRETILIN, tamba ema rihun ba rihun mate ba ukun rasik an hodi FRETILIN i ho FRETILIN maka loti povu Timor-Leste ba Ukun rasik an.
“Ami Joventude FRETILIN husu ema hotu-hotu atu labele halua no nega FRETILIN nia sakrifisiu no nega Timoroan rihun ba rihun ne’ebe mate tamba ukun rasik an,” deklara Protavos Juventudi FRETILIN, Gonsalo da Costa Goncalves liu husi konferensia Domingo (22/7) iha Merkadu Comoro, Dili, relasiona ho konferensia nasional CNRT semana kotuk, ne’ebe delegadu Partidu CNRT insultu ba Partidu FRETILIN hodi hamosu violensia iha kapital Dili no Distritu balun.
Juventude FRETILIN hateten, kuandu nega no hakribit FRETILIN hanesan hakribit Estadu Timor, funu nain sira hotu inklui mos actual Prezidenti partidu CNRT, Kay Rala Xanana Gusmao rasik, tanba sira hotu mai husi FRETILIN.
Iha okaziaun ne’e, Juventude refere husu ba veteranus hotu atu tau atensaun maka’as ba ema ne’ebe hakarak sobu nasaun iha tempu okupasaun no ohin loron hakarak sobu tan rai ida ne’e.
“Ami Juventude FRETILIN husu ba maun funu nain sira ka veteranu atu tau atensaun maka’as ba ema oportunista sira ne’ebe lakohi nasaun doben Timor-Leste ukun rasik an,” haklaken Joventude FRETILIN ne’e.
Nune’e mos sira husu ba Timoroan tomak atu labele defama FRETILINtamba iha prosesu naruk ho FRETILIN mak lori Timor hetan ninia
independensia.
“Ami Juventude FRETILIN husu ba Timoroan tomak atu labele defama partidu FRETILIN ne’ebe halo hodi prosesu naruk hodi nasaun RDTL hetan ukun rasik an,” reals sira.
Nia mos haktuir, ema ne’ebe la gosta FRETILIN, tanba tauk ho FRETILIN, katak, kuandu FRETILIN mak kaer ukun, sira la hetan ona fatin no la naok tan ona povu nia osan.
“Naoksaun no korupsaun tenki la gosta duni FRETILIN, tanba karik ho FRETILIN, sira sei la hetan oportunidade atu naok,” deklara Goncalo.
Iha okaziaun ne’e Joventude sira mos husu ba CNRT atu labele hanoin katak, uza totaliter hodi ukun estadu ida ne’e.
“Ami Joventudi FRETILIN husu ba maun Xanana atu labele lori totaliter hodi ukun estadu ida ne’e, se-lae ukun an ida ne’e hodi maun maka lori mai duni, maibe maun rasik sei harahun fali,” dehan Gonsalo da Costa.
Aliende ne’e, sira mos lamenta ho atetude PNTL ne’ebe haktou matebian Armindo Pereira ninia vida iha Suku Hera, foin lalais ne’e.
“Ami jovenutde FRETILIN konese sira no kompriende sira nia hakarak tanba ne’e estadu rona mos ami la’os tiru ami,” haklaken nia.
.