FRETILIN-CNRT Hadau Palacio Governu

 FOTO TEMPO SEMANAL

 NOTISIA TEMPO-SEMANAL

DILI-Partidu istóriku Fretilin tenke servisu maka’as iha durante periodu kampaña hodi bele kompete ho partidu foun CNRT ne’ebé xefia husi lider istóriku Kay Rala Xanana Gusmão. Istorikamente, Fretilin xefia husi lider diplomata Dr. Mari Alkatiri núdar Sekretariu Jeral, maibé lider diplomata nee tenke fera kakutak hamutuk ho ninia Prezidente Partidu Francisco Guterres Lu-Olo, hodi bele kompete ho lider rezistensia Xanana Gusmão.
Maske nune’e, povu mak sei deside entre partidu raksasa rua ne’e ne’ebé maka merese hetan fiar husi povu hodi ukun governu. “Ha’u hanoin partidu Fretilin ho CNRT maka sei hadau Palacio Governu. Partidu sira seluk hisik kosar wen para hadau de’it kadeira Parlamentu Nasional”, dehan Manuel Branco, finalista siensia politika Universidade Nasional Timor Lorosa’e foin lalais ne’e.
Liutan Manuel haktuir, lider partidu Fretilin ho partidu CNRT, iha esperiensia hanesan tanba sira kaer ona governasaun. Tanba ne’e povu hatene entre partidu rua ne’e ida ne’ebé maka merese atu kontinua hetan fiar husi povu hodi kaer governu.
“Tuir ha’u-nia hanoin, partidu rua ne’e ida-idak iha ninia frakeza rasik. Maibé povu mak hatene frakeza iha parte saida tanba povu bele sente husi dezenvolvimentu ba sira-nia vida loro-loron nian, durante partidu rua ne’e kaer ukun. Maibé se ema husu ha’u hili ida ne’ebé maka ha’u dehan hili CNRT tanba iha vontade no dedikasaun di’ak ba dezenvolvimentu no kombate korrupsaun. Liu-liu tanba fó opurtunidade ba jerasaun foun atu partisipa iha governasaun,” dehan Manuel. (ts)