DILI, (ANTIL) – Diretór Nasionál Apoia Administrasaun
Suku (DNAAS), Amandio Paulino Gastão Sousa informa,
rezultadu eleisaun xefe suku iha teritoriu Timor-Leste,
feto hamutuk nain 20 mak eleitu sai lideransa komunitaria.
“Dadus ne’e nu’udar rezultadu finál eleisaun xefe suku
iha teritoriu Timor laran,” Amandio Paulino Gastão Sousa
informa iha konferénsia imprensa iha edifisiu
Ministériu Administrasaun Estatál, Segunda, (14/11).
Nia hatutan, feto nain 20 ne’e hatudu partisipasaun iha poder lokál nu’udar mudansa hodi
kompara eleisaun iha 2009 ne’ebé iha de’it feto hamutuk 11 mak eleitu hosi suku 442 iha
teritoriu Timor laran. Feto ho pursentu 2.4 mak asime kargu nu’udar xefe suku iha 2009
no 2016 feto iha pursentu 4.5 mak eleitu nu’udar xefe suku.
Munisípiu Aileu feto nain haat no mane nain 27 hosi totál suku 31. Munisípiu Ainaro feto
ida, mane nain 20, hosi totál suku 21. Munisípiu Baukau, feto nain lima no mane nain 54,
hosi totál suku 59.
Munisípiu Bobonaro feto laiha, suku 50 ne’e mesak mane mak assume kargu nu’udar xefi
suku. Kovalima feto ida, mane 29 hosi totál suku 30. Munisípiu Dili feto tolu, mane 28 hosi
suku 31.
Munisípiu Ermera feto laiha, mane hamutuk 52 eleito ba xefe suku iha suku hamutuk 52.
Nune’e mós Lautem feto laiha, mane hotu hosi suku hamutuk 34.
Likisa, feto ida no mane 22 hosi totál suku 23. Manatutu feto 2, mane 27 ba suku 29.
Manufahi feto 2, mane 27 hosi suku 29.
Entertantu RAEOA (Oé-cusse) feto laiha, mane hamutuk nain 18 mak sai xefe suku ba suku
hamutuk 18. Munisípiu Vikeke feto ida no mane 34 hosi totál suku 35.
Tuir Amandio Paulino Gastão Sousa, loron 24 fulan ida nia laran, xefe suku eleitu
sira hamutuk ho konsellu suku hili tan reprejentante juventude feto no mane nomos
konsellu suku ba kada suku ida-idak nian.
Nune’e iha inisiu fulan oin, xefe suku sira sei hetan tomada de posse hodi asume
responsabilidade iha suku durante mandatu tinan hitu.
(jornalista: Manuel Pinto; editora: Rita Almeida)
Foto: Diretór Nasionál Apoia Administrasaun Suku (DNAAS) Amandio Paulino Gastão Sousa
(liman Los) ko'alia ba jornalista sira iha Konferensia Imprensa hodi anunsia rezultadu
eleisaun suku segundu ronde. Foto ANTIL)