DILI: Durante tinan 10 nia laran governasaun ne’ebé Partidu CNRT ho ninia aliadu sira kaer hatudu mudansa balun, maski nune’e sei iha frakeza ne’ebé presiza atu hadi’a.
Premiadu Nobel da Pas no eis Prezidente Repúblika José Ramos Horta fó ninia hanoin ba serbisu ne’ebé governu, hahú husi governu Aliansa Maioria Parlamentar to’o Bloku Koligasaun, hala’o. Horta fó atensaun liu ba seitór edukasaun iha lideransa eis Primeiru Ministru Kay Rala Xanana Gusmão.
"Ha’u fó parabéns ba Xanana ne’eb’e durante tinan 10 nia laran halo fundu ida naran Fundu Rekursu Umanu. Maibé tenke hadi’a mós eskola sira iha aldeia, suku, merenda eskolar, kualidade professor, no bee-moos ba eskola seidauk sufisiente,” dehan Horta ba jornalista sira iha eskola Cristal, Sesta (21/10).
Tuir Horta, edukasaun sai hanesan seitór importante no prioridade ba governu ne’ebé de’it mak kaer ukun atu dezenvolve.
Nia hatutan, durante governasaun ne’ebé kaer husi Xanana halo ona esforsu maka’as ba edukasaun. Tan ne’e iha 2017 bainhira iha governu foun, tenke esforsu maka’as nafatin.
Kona-ba Fundu Rekursu Umanus, Horta dehan, Governu ne’ebé Xanana lidera tau osan lubuk ida hodi haruka joven sira ba estuda iha rai li’ur hanesan iha Tailandia, Filipina, Malázia, Australia, Brazil, no nasaun seluk tan.
Aleinde ne’e, eis PR ne’e dehan, durante kaer ukun Xanana konsege implementa ona programa lubuk ida hanesan eletrisidade, estrada, sentru saúde, no seluk tan.
“Maibé sei iha buat balun ne’ebé sei faila. Ne’e normal iha prosesu konstrusaun estadu nian,” dehan Horta. (*)