Prezidente Komisaun Funsaun Publika, Faustino Cardoso. (FOTO: cfp.gov.tl)
DILI: Tuir estatutu funsaun publika, ema ida ne'ebé serbisu iha instituisaun estadu labele simu salariu husi fatin rua ho fonte finansiamentu estadu nian. Maske nune'e, tuir dadus husi Komisaun Funsaun Públika (KFP) hatudu katak iha funsionariu pùbliku, inklui dosente balun simu salariu dupla.
Tuir dadus ne'ebé KFP rekolla, iha funsionariu públiku na'in 10, inklui dosente Universidade Nasionál Timor Lorosa'e (UNTL) balun mak durante ne'e simu salariu dupla.
"Labele ema ida simu salariu rua ho osan ne'ebé mai husi orsamentu jeral estadu nian. Ne'e labele", deklara Prezidente Komisaun Funsaun Públika (KFP), Faustino Cardoso iha palasiu governu, Tersa (08/11).
Prezidente KFP ne'e, fó atensaun maka'as liu ba dosente sira ne'ebé halo serbisu rua no simu mós osan dupla.Tuir artigu 9 estatutu funsaun publika, Faustino dehan, fó posiblidade ba dosente sira atu halo asesoria no simu de'it subsidiu. Maski nune'e serbisu asesoria ne'e labele prejudika fali nia serbisu prinsipal nudar dosente.
"Lei hatete nudar dosente labele prejudika servisu dosente nian. Dosente nia servisu funsional mak hanorin", katak prezidente KFP ne'e. Bainhira dosente ida halo serbisu seluk ne'ebé prejudika ona ninia serbisu funsional, tenke hola medidas. Tanba ne'e, nia dehan, KFP hein klarifikasaun husi UNTL nune'e KFP bele hetan informasaun di'ak liu tan. (*)