DILI: Tribunal Distrital Dili (TDD) fó de’it autorizasaun ba arguidu Emilia Pires atu reprezenta Timor-Leste hodi partisipa iha enkontru g7+ iha Nova Iorke, la’os atu halo tratamentu saúde iha Australia.
Juiz prosesu TDD, José Maria de Araujo dehan, iha pedidu ne’ebé hato’o ba TDD arguida la hakerek kona-ba tratamentu saúde iha Australia.
Juiz ne’e hatete, hafoin to’o iha rai li’ur mak arguida haruka karta rekerimentu ida mai tribunal, liu husi nia advogadu katak arguida atu halo tratamentu saúde iha li’ur.
"Não, tribunal autoriza nia atu partisipa iha g7+, la’os ba halo tratamentu saude. Bele (halo tratamentu saúde) maibé tenke iha pedidu foin bele ba," deklara juiz prosesu ne’e iha TDD, Segunda (31/10).
Ba rekerimentu husi arguida, José dehan tribunal sei haruka karta ba Ministériu Públiku (MP) atu foti desizaun.
"Haruka pareser ne’e ba depois rona rezultadu husi MP.mak foin foti desizaun," hatete Juiz ne’e. (*)