Jornal INDEPENDENTE - Kinta, 14 Junu 2012
Valor Governasaun Aliansa Maioria Parlamentar (AMP) iha area rural sei hetan Index Prestasaun (IP) mean, tanba durante tinan 5 nia laran dezenvolvimentu ekonomia seidauk habelar to’o area rural.
Vise Dekanu Fakuldade ekonomia, Universidade Nasional Timor-Leste (UNTL), Antonio Carceres hateten, durante tinan lima governasaun AMP seidauk dezenvolve ekonomia iha area rural tanba maioria sei sentraliza iha kapital Dili.
"Governu AMP la dezenvolve ekonomia merkadoria to’o iha area rural, maibe la’o de’it iha kapital Dili," tenik nia iha nia servisu fatin, Kampus Ekonomia, UNTL, Dili loron (13/6).
Tuir observasaun ne’ebe nia parte halo katak, Governu AMP mudan sa ba dezenvolvimentu maka aumenta rendimentu funsionariu no subsidiu ba ferik katuas sira, maibe koalia konaba sistema monitaria osan ne’e tinan-tinan aprova maibe osan ne’e halo saida.
"Faillansu ne’e atu hadia, bainhira partidu politiku ruma sai vensidor iha eleisaun parlamentar periodu ne’e," dehan nia.
Iha parte seluk, Adina Casarumalai, estudante finalista UNTL, Fakuldade ekonomia hateten, dezde inisiu Governu planeia atu sosa produtu lokal liu husi programa "Povu Kuda Governu sosa", maibe produsaun agrikultor barak la to’o iha merkadu tanba iha area rural la asesu ba estrada ne’ebe ita teritoriu tomak aat.