Diretor Organizasaun Não
Governamental (ONG) Yayasan HAK Manuel Monteiro informa katak, Estadu
Timor-Leste (TL) tenki halo redusaun ba saláriu asesor sira ne’ebé aas,
iha kada ministériu hodi bele tau rezerva ba fundu Timor-Leste (TL).
“Estadu tenki hahú halo prevensaun no
hahú ko’a saláriu asesor ne’ebé aas hodi halo rezerva ba ita nia fundu
hodi antisipa wainhira mina hotu ita la monu ba situasaun krizi, mezmu
agora ita deve tiha ona iha banku mundial, ADB no JICA Japaun”, hateten
Manuel Monteiro ba JN-Diário iha ninia kna’ar fatin Farol-Díli, Kuarta
Feira (30/09).
Nia fundamenta katak, saláriu máximu
ne’e maka Prezidenti Repúblika (PR) no hotu-hotu tenki iha PR nia okos,
tanba ema númeru primeiru (1) iha nasaun ne’e maka PR, halo nusa maka
asesor internasionál no nasionál ne’e ninia saláriu aas liu fali, no
wainhira ne’e akontese instituisaun refere tenke responsabiliza.
Ninia efeitu maka wainhira osan mina
ne’e hotu tanba folin mina nian iha merkadu internasional hahu’u tu’un
ita lebele selu ema sira ne’e, konserteja servisu sosial labele la’o no
atendimentu ba povu nia bem estar ne’e labele la’o I povu nia direitu
atu asesu ba atendimentu públiku ne’e sai menus.
Manuel Monteiro argumenta katak,
instituisaun ida-idak lolo’os sira tenke iha lei ida kona-ba ema nia
servisu sira hanesan ne’e, purejemplu se o mai hanesan asesor o nia
servisu no obrigasaun ne’e saida, no o nia direitu ne’e to’o iha ne’ebé,
ne’ebé instituisaun ida-idak tenke iha lei internu ida hodi regula
kona-ba obrigasaun no direitu funsionariu, mezmu iha lei Komisaun
Funsaun públika (KFP) nian iha tiha ona.
Ho nune’e bele eduka Timoroan sira hodi
servisu ba valor la’os servisu ba osan, se o hakarak osan karik bisnis
iha liur la’os ba buka fali riku iha instituisaun sira, tanba
instituisaun Governu ne’e ba para atu servi no atu hana’I povu.
Estadu tenke foti ona medidas hodi
hahu’u redus salariu ba asesor internasional no nasional sira, se sira
lakoi hasa’I tiha, tanba wainhira sira sai ita foin hatene lolo’os katak
se maka nasionalista lolo’os, ho situasaun ida hanesan ne’e maka ita
foin iha izame bo’ot ida ba ita hotu-hotu ninia konsiensia atu defende
soberania Estadu iha momentu ida hanesan ne’e, dehan Manuel Monteiro.
Entretantu tuir Diretor Organijasaun
Naun Govermental (ONG) Judicial System Monitoring Programme (JSMP) Luis
de Oliveira Sampaio hateten, normalmente ema hotu-hotu tenke hetan ema
espesialista atu apoiu servisu iha kualker ministeriu ida-idak nian,
maibe tenke iha balansu no tenke sukat vantajen husi saida maka asesor
sira fo ba kada instituisaun ida-idak.
“Hau la fiar asesor sira ne’e bele
rejolve problema hotu-hotu, dalaruma asesor ninia nasehat ne’e ema la
simu tan, tanba politiku balun tau asesor maibe kadavez la uja, kecuali
asesor sira ne’ebé ajuda halo esbosu lei ruma no halo lei ruma iha sira
nia espesialidade ne’ebé maka metin ona peritu ba area ne’e”, dehan Luis
Sampaio.
Lolo’os ne’e Governu tenke fo de’it
kontratu ba sira durante praju fulan 3 ka fulan 6 depois sira finalija
aprejenta mai ministru ne’ebé maka fo kontratu sira lori ba Konsellu
Ministru (KM) hotu remata ona, ita la presija selu fulan-fulan hanesan
ne’e tanba gastus ne’e bo’ot liu, no se bele hau hanoin fo kontratu ema
sira ne’e hodi fo kapasitasaun kona-ba servisu asesor nian ba Timoroan
sira hodi servi fali Governu TL.
Jornal Diariu