Governu Hili Kompania Silias Halo Monumentu Saudozu Xavier

DILI – Kompania Silias Unipessoal LDA, neebe kaer konstrusaun monumentu Saudozu eis Prezidente Fransisco Xavier do Amaral iha merkadu lama, la liu husi tenderizasaun, maibe governu hili deit (single source), tanba sira fiar katak kompania nee sei halo obra ho kualidade.

Lia hirak nee hatoo husi Adjuntu Diretor Ajensia Dezenvolvimentu Nasional (ADN) Rui Lorenco, ba Jornalista sira, iha nia knar fatin, Fatuhada Dili, Segunda (21/11/2016).

Prosesu tenderizasaun hari konstrusaun monumentu saudozu Xavier nia nee liu husi Single Source, tanba kompania ida nee involve iha prosesu konstrusaun estatua iha rai laran, depois sira iha teknika neebe diak, entau prontu sira hili dalan liu husi Single Source, tanba lei fo dalan governu halo single source ba kompania sira,” hateten Rui.

Adjuntu Direitor nee haklean tan katak orsamentu ba konstrusaun monumentu nee hamutuk Sete sentus dosi mil, tanba nee Prosesu Konstrusaun ba Monumentu Fransisco Xavier do Amaral iha Merkadu Lama nee lao, maibe iha mudansa dezenhu no estruturs maka atraza oituan, lolos hotu iha loron 24 Novembru.

Iha parte seluk Martinho da Costa nudar Ativista hateten tuir lolos single Source nee la bele mosu, se mosu, tanba sira hili malu deit no hamate kompania seluk. Informasaun kompletu iha STL Jornal no STL Web, edisaun Tersa (22/11/2016). Joao Anibal