DILI – Arguidu Armindo
Pereira Martins oho mate nia kaben Maria Nunes Cansio Soares, tanba deit
atu hola fali feto kiik, hodi halo nia oan nain ualo moris moris nudar
oan kiak neebe laiha inan no aman.
Liu husi audensia julgamentu tribunal
kontinua rona deklarasaun husi sasin, Filomeno Pereira Martins neebe
nudar arguidu nia oan mane. Ho lian triste no halerik nia hatete, agora
nee nia ho nia maun alin nain hitu moris hanesan oan kiak, tanba laiha
inan no aman. Sira nia inan mate tanba arguidu mak oho, ho motivu
arguidu hakarak atu hola fali feto kiik.
Hau la gosta hau nia aman, tanba nia oho tiha ami nia inan hodi husik hela ami nain ualu mesak. No nia mos agora iha tiha komarka laran. Durante ami nia inan moris, sira nain rua sempre diskute malu hela deit. Hau nia aman hakarak atu hola fali feto kiik maka hodi too oho mate tiha ami nia inan,” tenik nia ho lian triste iha TDD.
Nia hatete, iha momentu nee sira sai husi
uma atu ba kuu modo iha mota. Antes atu sai husi uma arguidu ho lezada
diskute malu tiha ona, tanba arguidu husu osan atu hola tua lezada dehan
laiha. Nunee sasin ho nia maun alin Sergio, Nicolao ho lezada mak lao
hamutuk, Cançio, Lourdes no arguidu tuir husi kotuk i sira lao tutuir
malu deit.
Too iha mota sasin haree arguidu lori
fatuk tuku iha lezada nia kanuruk depois tebe ba mota laran, no foti tan
fatuk boot ida hodi tuda tan. Iha momentu nee sasin ho nia maun alin
nia posizaun iha fali arguidu no lezada nia kotuk.
Haree ida nee lezadu Cancio neebe nudar
lezada nia subrinhu hakilar hodi hasee dehan Tiu nusaa mak baku tia
hanesan nee. Rona ida nee arguidu duni tuir nia hodi dulas kakorok too
mate soe ba mota laran.
Hatan ba akuzasaun nee arguidu deklara,
akuzasaun nee balun los no balun sala. Lalos nia mak oho, arguidu ho
Filomeno fila ba uma foti lipa rua no tali rua hodi foti mate isin.
Arguidu rasik mak fo hatene ba familia sira katak vitima nain rua mate
tanba monu ba mota. Informasaun kompletu iha STL Jornal no STL Web,
edisaun Sabado (19/11/2016). Domingas Gomes